PAGKAIN NG TSOKOLATE, MAINAM PARA MAIWASAN ANG DIABETES

Ayon sa bagong pag-aaral, ang tsokolate ay nakakapigil sa sakit na diabetes. Sa natuklasan ng mga scientist, isang compound na matatagpuan sa cocoa na tinatawag na epicatechin monomers ay nae-enhance ang secretion ng insulin mula sa mga specific cells. Nakita rin na nababawasan ng naturang compound ang pagiging obese at natutulungan ang mga hayop na makaya ang mataas na blood glucose level.

Gayunman, sa mga hayop pa lamang nasusubukan ang naturang pag-aaral. Ayon sa mga researcher, ang mga tao ay mangangailangan ng mas maraming compound para makuha nila ang benepisyo nito. Ayon kay Prof. Jeffrey Tessem, study author ng pag-aaral  mula sa Brigham Young University, ang mga tao ay kailangang kumain ng maraming cocoa, ngunit mas kaunti dapat ang sugar content dahil ang mahalaga ay ang component na matatagpuan sa cocoa.

Sa pag-aaral na ginawa ng mga researcher, pinakain nila ng epicatechin monomers ang mga hayop na may high fat diet. Matapos nito, natuklasan nila na nabawasan ang pagiging obese ng mga hayop at mas nakayanan pa nilang kumilos sa kabila ng mataas na glucose level sa katawan. Sa paliwanag ni Prof. Jeffrey Tessem, pinoprotektahan di umano ng epicatechin monomers ang cells at pinatataas din ang kakayahan na makaya ang oxidative stress. Aniya, mas pinalalakas ng naturang compound ang mitochondria sa beta cells na naglalabas ng mas maraming ATP kaya mas maraming insulin din ang lumalabas